2011年2月17日星期四

我的20年經歷

今次想分享下自己經歷 ,有機會我一定會告訴俾自己仔女知,等佢地知道幸福係愛你的父母家人一步一步不斷建立的,他們放棄左很多享樂及機會。要懂得珍惜!而且信念係非常重要的
198x~1988年
當年家住在木屋區,間房子好細,大約只有80尺,一家四口,冇房冇厠,只有兩層床位,好多事包括食飯睇電視,做功課,玩都係向床上!但是果時好多鄰居都好熟,都幾好玩!另外有幾件事特別難忘
當時剛搬到我無知地問:媽媽,點解間屋重細過我們以前的廁所(國內家)?跟住她掉了淚..
其實我自己都唔知有冇講過,呢2年同媽子講開佢話返俾我聽的
第二樣最記得就係由80尺木屋搬到120尺,當晚噴殺蟲水,整間80尺屋竟然能夠跑出超過500隻小強現場環境簡直極恐怖,死亡的超過300~400隻。另外我最怕去公廁,因為一定有很多屎,好鬼臭.
當時家父每天俾我$2~$4,而我好想買部任天堂所以從來不會用$買小食,日子有功,竟然一年內儲了$800多,我自己也驚訝,但最後冇買到,因為給他們發現我有這麼多$,怕我亂用,幫我儲起
1987~1989年
由於一些原因,連木屋都冇得住了,幸好當時姑婆俾左一間房我地住,而我同大佬當然係廳長啦當時父母冇一日有放假,而且日日加班,而我每星期六日就去幫老豆手,每次他會給我20~60左右
1989~1994年
始終住在人家極不方便,於是家人當時用了27萬買了一個官塘唐9樓500尺屋,我地成家已經極開心了,因為終於有'房'住,唔使瞓廳!同期家父在國內起了間屋俾爺爺們住,可以想像下當時供款有几多,几鬼辛苦!
但住唐樓行樓梯不是什麼問題,最慘係夜返家,整條樓梯可以時時壞燈泡,黑暗一片,真係伸手不見五指,手放向面前都見唔到。夜返上樓而又冇光又唔想俾人知自己怕層樓又舊又靜果啲感覺真係..非筆墨能解釋的,所以有時候等到有人上樓先立即一齊上,但又有時又會諗多左,頭先跟住果個人係唔係人呢?哈哈~~因為太黑,根本見唔到人,只係聽到佢行的腳步聲,後來搬走先聽到大佬同老媽子原來每次返家如冇燈行樓梯都遇到我的問題,好怕黑行樓梯,所以當年好少夜返!
而官塘唐樓家父竟然用左3年多就供完左 (佢地啲儲蓄能力真係好強,冇記錯家父向官塘工作時,每日只是用$2~$4買份報子睇)
1995年~now
家人用210萬買入700尺連車位的洋樓,當時樓市升得很快,到1996年已經有人用440萬想買入該單位,結果當年冇賣出,因為搬到怕,又怕冇屋住
2001年
我終於完成大學出來工作,有幸當時搵到$(2份正職工),自己又好似家父不使$,除左俾家用,工作了1年買了一個200萬的樓花,俾左20萬首期,俾完後月供8000+3500二按!當時心態只是想在自己有屋而不要亂使$! 供左2年多,儲蓄了30多萬還左二按,還完戶口啲$又要重新來過其實當年人工加起的確不錯,但3年多除了新年初一至三外,好像冇物放過假了,而且差不多每日都做到10:30-12:00後,加上本人儲蓄率奇高才能達到,而家回頭一看,全靠家人影響及自少習慣。而當時只會用儲蓄為主的方法,沒有做什麼投資,也冇時間學習理財!直到2005年才開始學習投資!2006年正式開始建立財務自由方舟開始收集現金流資產。而且直致上一年,總於說服家父(用左年多才能夠)把自住供完單位重新按揭而有一筆現金而買入一些資產令他增加現金流,及後同時不斷令我大佬明白買資產重要性而合資。
事情好像很順利就過左20年,而事實上一點也不簡單,如某年因為供樓,轉工,有多少人能像我大佬返二份工,月薪12000,俾家用10500-11000,完全冇時間回家瞓,每日只能在車上瞓! .....家父轉工等等
點解80年代我地冇諗過申請公屋或者購買居屋,事實上我地成家人夢想就係可以住一個有lift樓(公屋)已經很好了,申請多年,但每次總是有無限原因不能上樓。諗起都灰....
其實我一直都覺得一代幸運過一代起碼我未試過走難,未試過戰爭,又有書讀,又唔使好似阿爺一個人養十個八個仔女..只要多吃苦頭,總有陽光的一日!
現在老父已經轉行多年,但依然好勤力工作,而且呢份工作好多人做左好多年都冇佢搵得咁多,就係的士司機啦!佢平均都有20000以上純利!好鬼勁!冇做打折的,都唔知佢點搵客,佢之前份工連加班有13000左右
講左這麼多,其實我想講:生活無論點都好,將來只是一種經歷,無論以前或者到現在,一家人生活才是最美好的,能財務自由能有更多時間去關心自己想關心的事!
而我的夢想居所就是住一間三層高的村屋,有花園有天台,成家人一齊生活,得閒養下魚,種下花,玩下狗,教下小朋友,收集下股票,睇下書,睇下年報,...想做咁多野,唔財務自由點夠時間呀,到這樣時個人都几滿足了!
相信只要繼續堅持,一定能做到!!

沒有留言:

發佈留言